《十年》我未睇，但想講兩句。
去年我剛知道有呢套戲時，覺得有電影勇敢直率談香港政治，係今時今日嘅香港好難得，好擔心佢無聲無息地為人忽略。2015年11月15日看到《明報》登了家明和郭梓祺兩篇《十年》嘅影評，馬上轉載，希望更多人注意到呢套戲。
後來《十年》公映，吸引到愈來愈多人注意，並且因為放映場次有限，還一度出現一票難求嘅情況。咁當然係同我無關啦！我相信最大嘅原因，係非常難得有電影如此正面回應香港人嘅政治焦慮，因此即使電影本身有種種缺點，大家仍然非常樂意捧場。
《十年》榮獲最佳電影大獎，有人高呼藝術已死、香港電影金像獎信譽破產等等。咁香港唔係中國，仍然有（備受威脅嘅）言論自由，唔認同《十年》值得此獎嘅人，當然可以自由發表異議。數年前，《葉問》第一集得金像獎最佳電影，我認為該片除咗動作設計可觀之外，劇情及意識都幾垃圾，但我也不會因此便說金像獎信譽破產；同年嘅《天水圍的日與夜》雖然唔錯，但也有明顯的缺點。2013年《寒戰》得最佳電影、最佳導演、最佳編劇，但套戲我認為其實好差。香港電影從盛世沒落久矣，如今不時會出現要湊齊幾套有份量嘅作品、競逐金像獎也相當困難嘅情況，這是我們必須承認的現實。
日前好似係邱禮濤講嘅，大意係電影回應時代，與時代對話。今時今日嘅香港，自我審查盛行，在上位者集體自我閹割，時代氣氛鬱悶，咁有勇敢嘅年輕電影人，用非常有限嘅資源，非常有誠意地拍出他們回應時代嘅作品，而且確實得到好多觀眾嘅共鳴同欣賞，得到香港電影金像獎最佳電影，其實都好合理，係唔係咁話啊？
相關文章：李怡 - 《十年》獲獎實至名歸
>係唔係咁話啊？
回覆刪除絕對係。
其實我唔信乜奬物獎，我話呢啲全部係圈內人情獎。我覺得港台製作唔少短/中電視劇凡而質素高好多。有啲戲有「天皇巨星」主演，但垃圾中之垃圾，我係主角我要蒙面出街，拍啲咁戲（非指色情）我就無臉目見人嘞！俾黑社會揸槍迫拍呀？否則點可能應承拍啲咁嘅超爛片？好在我此生無需面臨巨大威逼利誘之抉擇。。。豐衣足食，無愧自己，於願足矣。
回覆刪除拍「十年」呢類題材片唔會志在商業搵食，我估志在有感而作之創意發揮 + 口碑（= 成就感）+ 希望起碼回本。攪網上電影啦，自由啲。早排部神怪片「無心大師」咪唔錯，網絡電影之路可以諗諗。況且此類片目標觀眾唔係五姨六婆七伯九叔，係比較上年輕一羣，網絡媒介仲可以世界各地通行。經費啦喎，天下間有心就有路。。。亞視蝕嘅都捱到十幾年，所以世事乜都有可能。
不過拍此類片莫天真要有心理準備，到時別怨「我恐懼 我誤判 我愧疚」，大佬，你踩癲佬條尾就要先計算自己膽量。。。
回覆刪除台灣電影界一直不敢以當代政治議題為題材拍片。拍一部電影要燒掉很多錢，很少有導演願意拿錢開玩笑。
回覆刪除導演比較無所謂，倒是不容易找到願意拍戲燒錢的老闆。
刪除